Вежбите што се користат за развивање на мускулите од карличното дно, ги зајакнуваат и мускулите на нозете, ги масираат стомачните органи и ги тонираат грбните мускули.
ВЕЖБИ
– Цепење дрва (кашта такшанасана). Клекни, рашири ги колената, испреплети ги прстите од рацете. Рацете испружи ги и вдишувајќи крени ги над главата. Спушти ги брзо надолу како да цепиш дрва, издишувајќи силно низ нос. Ако не можеш да клекнеш, тогаш изведи ја вежбата стоејќи.
Ги развива градните мускули и ги јакне мускулите во репродуктивните органи, како и мускулите на нозете.
– Поздрав (намаскарасана). Клекни и рашири ги колената. Спој ги дланките во положба на поздрав, лактите постави ги од внатрешната страна на колената. Вдишувајќи со лактите шири ги колената и донеси ги споените дланки пред градите. Главата крени ја кон горе и благо кон назад. Издишувајќи собери ги колената, испружи ги рацете, главата свиткај ја надолу, ако можеш допри ја брадата до градната коска.
Ги зајакнува мускулите од карличното дно и од грбот, како и мускулите на бутовите, колената, рамениците и на рацете.
– Полумост (кандхарасана). Легни на грб со свиткани нозе, дланките на подот покрај телото. Вдишувајќи крени ги нозете, задникот и трупот во облик на лак. Рамениците и главата остануваат на подот. Издишувајќи спушти се на подот.
Положбата полумост го отстранува заморот, ги растегнува и масира стомачните органи, грбот и ги зајакнува мускулите во нозете и од репродуктивните органи. Не се препорачува за трудници со висок притисок.
– Нозете горе-долу. Легни на лева страна, со едната дланка придржувај ја главата, другата стави ја на подот пред градите. Вдишувајќи крени ја десната нога нагоре, издишувајќи спушти ја врз другата нога. Повтори и на другата страна.
Го растегнува и ги зајакнува нозете и репродуктивните органи.
– Клекни-стани (уттханасана). Застани со раширени нозе. Прстите од дланките спои ги пред себе, сврти ги нагоре и пушти ги да висат. Издишувајќи спушти се малку надолу, како да ќе седнеш на столче. Свиткај ги колената. Потоа вдишувајќи крени се во почетната положба. Повторно клекни, но малку подолу од претходно, па пак исправи се. Конечно, клекни така што дланките ќе го допрат подот. Секој нареден пат спуштај се подолу се додека дланките не го допрат подот. Таа положба е позната како кагасана (клечење). Грбот држи го прав цело време.
Ги зајакнува мускулите на матката, внатрешната страна на бутовите, колената и зглобовите. Мошне е корисна за трудници по првите три месеци од бременоста, но изведувањето во последното тримесечје треба да биде внимателно или да се избегне. Не се препорачува за жени што имаат пролапс на матката.
