Со оглед на тоа што неразвиениот и слаб вид кај децата е честа појава, би било добро да се прави систематски преглед на видот кај децата помеѓу третата и четвртата година, а не дури пред одење во училиште како што најчесто се прави. Имено, ако слабовидноста се утврди околу седмата година, предоцна е за успешно лекување, односно, резултатите од лекувањето се неспоредливо полоши.
- Страбизмот не може да се лекува без носење на очила. Тие овозможуваат јасна слика и го поттикнуваат развојот на видот а го намалуваат и аголот на искривување на погледот.
- Во некои случаи се применува и лекување со оклузија (затворање на окото).
- Лекувањето трае со години и не е едноставно. Лекувањето мора да го следи развојот на видот, мора да биде континуирано и секојдневно и бара голем ангажман од родителите.
- Доколку постои отклон не е доволно само т.н.конзервативно лекување, туку мора да се направи и операција. Таа ќе ја подобри положбата на очите и естетскиот изглед и да создаде подобри услови за развој на видот. Најчесто се изведува во периодот помеѓу третата и четвртата година, секако пред да тргне детето во училиште.
