Ако некогаш сте се запрашале дали грешите во воспитувањето на детето или сте на добар пат, можеби овој текст ќе ви биде од полза. Удобно сместете се, внимателно читајте и не дозволувајте да ве ремети вашето галениче. Додека вие читате за воспитувањето, дозволете му да прави што сака! Нека прави крш, нека фрла играчки, нека крши се низ дома, затоа што е тоа еден од начините да ја изрази својата креативност. Еве некои од современите методи на (не)воспитување:
- Наместо играчка, купете му мобилен. Нема сигурно да дозволите во ерата на модерната технологија вашето дете да си игра со играчки со какви што сте си играле вие.
- Не му дозволувајте на детето да се облекува само. И така во животот ќе мора сешто да работи, затоа барем вие поштедете го.
- Никогаш не го карајте заради нередот во соба. Од мал мора да се научи да живее во хаос, затоа што тоа неминовно го чека низ животот.
- Дозволувајте му да пцуе што повеќе и што почесто. Како поинаку би го научил мајчиниот јазик!
- Не го присилувајте да јаде овошје и зеленчук. И од грицки и слатки може да се најаде.
- Инсистирајте да поминува што повеќе време пред екранот. Зошто би си играло надвор и би вдишувало честички прашина. Најбезбедно е дома.
- Не му дозволувајте да трча, да скока, да шутира топка, да скока на ластик. Секоја физичка активност ќе го замори, а вие секако не сакате вашето чедо да биде уморно и исцрпено.
- Купете му се што ќе посака. Не е важно дали му е потребно или не, важно е да му ги задоволите сите барања.
- Дозволете му да ја занемари личната хигиена. Не само што ќе го поштедите детето од здодевни ритуали, туку и ќе заштедите на средства за лична хигиена.
- Кога ќе тргне на училиште научете уште во старт да заземе став. Мора да се знае кој е главен. Доколку учителката го погледне попреку или го опомене затоа што е немирен, задолжително реагирајте. Ако веќе сте го научиле дека е тоа секогаш во право, мора да му ја сочувате репутацијата.
Доколку се препознавте во некоја од овие ставки, време е да реагирате!
