Од 3-ти до 7-ми март во Скопје Сити Мол ќе се одржи солидарен базар во организација на Здружението за еднородителски семејства „Една Може!“, на кој ќе можат да се купат рачни изработки, уметнички дела и природна козметика изработени од членките на здружението. Купувајќи некој од производите се вреднува и поддржува трудот на членовите на оваа организација.
Здружението „Една може!“ (One can!) е доброволно, непрофитно, невладино, и непартиско здружение на граѓанки, самоиницијативно формирано со слободно здружување заради остварување на севкупна општествена грижа и третман на еднородителските семејни заедници и остварување на нивните економски, социјални, хуманитарни, здравствени, образовни и културни права.
„Согледувајќи ги потребите на членките и членовите на еднородителските семејства во земјава, се обединивме, си ја создадовме One can!, група за самопомош, пред неколку години, а во мај 2016. оформивме официјално Здружение за унапредување на правата на еднородителските семејства во земјава, Една може! – Скопје. Ова е пластичен пример за она што значи женска солидарност, а Скопје Сити Мол ни излезе во пресрет и стана дел од креирањето на посреќни приказни за еднородителските семејства во земјата“, вели Дороти Пачкова-претседател на здружението.
Претставникот од Скопје Сити Мол кој го поддржа овој базар ги повика сите граѓани да го посетат и да купат некој од производите.
„Со тоа ќе покажеме голема свест и респект кон различностите, особено кон жената како столб на семејството. Токму оваа порака сакаме да ја испратиме по повод Денот на жената“, вели Дарко Панчевски од Скопје Сити Мол.
