Секоја година научниците наоѓаат нови информации за различни нутриенти и за нивната важна улога за растот и развојот на фетусот, како онаа за намалување на ризикот од породилни дефекти и болести кај новороденчињата.
Иако пренаталните додатоци во исхраната можат да помогнат, најважна улога сепак има правилната исхрана.
Во продолжение ви ја презентираме листата со нутриентите кои имаат најзначајна улога за растот и развојот на бебето, како и нивната препорачана дневна доза.
1. Протеини (71 g)
Аминокиселини, соединенија од кои се изградени протеините, се одговорни за растот на ткивото на бебето но и за ткивото на мајката. Во групата намирници богати со протеини, се вбројуваат немрсното месо, месото од пердувести животни, рибите, млечните производи, јајцата, мешунките и јаткастите плодови.
2. Калциум (1000 mg)
Калциумот е минерална материја исклучително важна за раст на коските на бебето. Освен тоа, адекватното внесување на овој нутриент го намалува ризикот од губење на коскена маса кај идната мајка. Добри извори на калциум претставуваат млекото и млечните производи, темнозелениот лиснат зеленчук, лососот, рибите со коски како сардините и скушите мешунките и сувите сливи.
3. Фолати (600 µg)
Овој витамин од групата Б – витамини има заштитна улога од развој на дефекти на невралната цевка како спина бифида. Со оглед на тоа што споменатите дефекти настануваат во првите 28 дена по зачнувањето, пред повеќето луѓе да се воопшто свесни за својата бременост, препорака е дека сите жени во репродуктивен период во својата исхрана треба да вклучат што повеќе намирници богати со фолати и да земаат додатоци во исхраната со фолна киселина доколку планираат бременост. Некои од намирниците кои се богати со фолати се спанаќот, шпарогите, мешунките, брокулата, карфиолот, прокељот, пченичните никулци, пивскиот квасец, портокалот, жолчката, црниот дроб, лососот и млекото.
4. Витамин Ц (85 mg)
Неодамнешните истражувања покажуваат дека витаминот Ц може да го намали ризикот од прерано породување. Исто така, научниците сметаат дека овој нутриент има незаменлива улога во правилната синтеза на колагенот. Во добри извори на витамин Ц се вбројуваат цитрусите, пиперката, јагодите, доматите, зелката, калинките, компирите, лиснатиот зеленчук, брокулата.
5. Железо (27 mg)
Железото има важна улога како за мајката така и за нејзиното неродено бебе – помага во пренесувањето на кислородот преку крвта до клетките, како и во одржувањето на функциите на мускулите и органите. Добри извори на железо се црвеното месо, школките, рибата, пилешкото, житарките и зеленчукот.
6. Омега – 3 масни киселини
Иако не постојат препораки за дневно внесување на омега – 3 масните киселини во текот на бременоста, познато е дека тие имаат важна улога во овој чувствителен период од животот – важни се за растот на мозокот на бебето, за очите, како и за нервниот систем. Најдобри извори на омега – 3 масни киселини се масните риби, лененото семе, тофу, оревите, и канола маслото.
