Откако ќе станете родители, грешките ќе станат составен дел од вашата дневна рутина. Некои грешки на новите родители се вообичаени за многумина. Или навистина ќе згрешите или ќе мислите дека правите грешка или ќе ве обвинат дека сте згрешиле … Но не грижете се, со текот на времето, нивната фреквенција се намалува, а најважно од се е дека тоа не значи дека сте лош родител!
Ќе ви ги откриеме грешките на новите родители што можете да се обидете да ги препознаете и да ги избегнете.
Верувате во сѐ што слушате
Оваа грешка особено важи за првите неколку недели. Тогаш имате потреба да барате совет од секој што поминал низ истото како и вие. Дури и ако не барате совет, ќе го добиете. Вашата најдобра пријателка мисли дека треба да спиете со бебето, братучетката ви вели никако. Вашата сестра вели дека е во ред бебето да го цица прстот, педијатарката вели дека е подобра цуцла.
РЕШЕНИЕ: Одлучете да се слушате исклучиво себеси и вашиот партнер. Одлучете кој принцип најдобро ви одговара и правете го токму тоа. Игнорирајте ги другите совети. Знаете повеќе отколку што мислите!
Ја преценувате количината на слободното време
Без оглед на тоа колку долго ќе останете на породилно/родителско отсуство, мислите дека тоа време ќе ви биде – слободно. Тоа нема да се случи. Имате нова работа и мал, гласен шеф кој нема да ви даде пауза дури и за време на викендите. Планирате да ги организирате плакарите, да вежбате, да се дружите со пријателите … А всушност ќе биде врв на денот ако се истуширате.
РЕШЕНИЕ: Поставете си реална цел секој ден. На пример: возвратете повик, наместете го креветот, ставете ги алиштата во машината за перење. На крајот од денот, ќе ви биде полесно кога ќе ги отфрлите од листата.
Го занемарувате вашиот партнер
Кога вашиот партнер ќе дојде дома, зад вас е цел ден со пелени, смирување, заспивање, нега. Кога ќе ви пријде со мислата за блискост, веднаш ќе му дадете до знаење да прошета.
РЕШЕНИЕ: Ако можете да си дозволите дадилка, нека го причува детето неколку часа. Одете на прошетка. Тоа ќе биде доволно! Да, ќе зборувате за бебето, но договорете се дека треба да разговарате и за други работи.
Се ставате себеси на последно место
Вашето кафе се лади, понекогаш мислите дека навистина смрдите, не се сеќавате кога сте биле на фризер … Не, не, и не – не треба да биде така.
РЕШЕНИЕ: Времето е од суштинско значење за вас. Не станува збор за време за уживање, туку потреба. Треба да најдете време за да разговарате со пријателката или да посетувате часови по јога. Треба да се грижите за себе. Колку сте посреќни, толку ќе бидете подобри родители.
Не ги споделувате обврските
Партнерот не се снаоѓа ни во детската соба? Никогаш не го капел детето? Грижата за новороденчето едноставно не е работа што треба да ја заврши само едно лице.
РЕШЕНИЕ: Кога вашиот партнер прави нешто со детето, не ѕиркајте преку рамо и не проверувајте. Не давајте инструкции. Можеби тој не прави се исто како вас, но тоа не значи дека не е добро. Верувајте му и тој ќе ви возврати со почесто извршување на таа задача.
Го претпоставувате најлошото
Некои деца се навистина болни и развиваат некои состојби што можат да бидат загрижувачки. Меѓутоа, здраво дете, исто така, развива симптоми што предизвикуваат паника кај родителите: осип, кашлица, дијареа … Лесно е да полудите од грижи кога бебето е навистина мало.
РЕШЕНИЕ: Обучете се да не претерувате со грижа додека не се покаже и докаже дека е потребно. Растењето дете треба да биде позитивно искуство. Не го уништувајте со прекумерна грижа. Кога ќе добиете потврда од лекар дека нешто не е во ред – тогаш можете да се грижите! Дотогаш, верувајте во најдоброто.
Го споредувате детето со другите
Дали спие цела ноќ? Дали веќе седи? Дали се смее? Кога гледате дете помладо од вашето во паркот, кое веќе шета, а вашето не покажува интерес, лесно е да се загрижите. Кога ќе слушнете како бебето дрдори, а вашето бебе се уште не зборува ништо, ве фаќа паника.
РЕШЕНИЕ: Заборавете на табелите и упатствата! Заборавете на другите бебиња! Секое бебе се развива со свое темпо. Ако лекарот потврди дека сe е во ред – бидете трпеливи и вашето бебе ќе го направи тој чекор во одреден момент. Подоцна ќе зажалите дека и онака пребрзо пораснало…
Фото: Pixabay
