Мелиса Вилетс е мајка на три девојчиња, и се смета себеси за многу строга мајка и е горда на тоа. Прочитајте ја нејзината филозофија на родителство:
„Мојата строгост им користи на моите деца многу повеќе отколку што ги ограничува“.
Светот понекогаш може да биде застрашувачко место, а кога сте родител, бескрајната загриженост може да ве држи будни цела ноќ. Самото возење на децата на училиште може да ме вознемири ако размислувам што сè може да се случи кога тие се без мене. Од пукање во училиште до деца предатори и насилни деца, па и злоупотреба на Интернет, потенцијално ужасните ситуации во кои децата можат да се повредат се безбројни. Затоа не сакам да им се извинувам на моите деца или на општеството затоа што сум многу строга мајка. Секако, моите деца често се жалат на долгиот список на мои правила, но тоа воопшто не ме загрижува. Знам дека моето премногу заштитничко однесување е потребно за да ги чувам моите деца безбедни колку што можам. Покрај тоа, убеден сум дека мојата строгост им носи корист на моите деца многу повеќе отколку што ги ограничува.
Кога станува збор за воспитување на моите три девојчиња на возраст од четири, седум и девет години – ова се моите четири најголеми правила:
1. Без мобилен телефон
Се разбира, не засекогаш. Но, мојата ќерка која оди во четврто одделение од основно училиште тврди дека е единственото дете во класот што нема мобилен телефон. Добро, не ми е гајле што нејзините врсници сметаат дека не е кул затоа што нема нешто што јас не го добив до поаѓањето на факултет. Секако, не планирам да чекам толку долго за да ѝ дозволам да има мобилен телефон, но сега не гледам потреба за тоа. Ако можам да ја држам уште некое време подалеку од социјалните мрежи и потенцијалните лоши влијанија, тогаш ќе го сторам тоа. Единствената причина поради која мислам дека би ѝ требал мобилен телефон е за да ме контактира во итен случај, но мислам дека за тоа постојат и други начини.
2. Нема играње во домовите на деца чии родители не ги познавам
Тоа е точно. Нема да дозволам родител што не го знам да го „земе“ моето дете од училиште и нема да ги земам моите деца и да ги носам во домовите на луѓето што не ги познавам. Повеќе сакам моите деца да играат со помалку деца отколку да ги оставам во непознати домови и подоцна да жалам ако се случи нешто што не ми се допаѓа. Пред да ме отпишете како луда жена, сметајте дека на почетокот на моето мајчинство дознав за еден немил инцидент во кој моето мало девојче било присилено да ги соблече пантолоните во куќата на својот нов пријател. Само да кажеме дека од тогаш не мислам да се извинувам затоа што сум премногу внимателна.
3. Нема преспивање кај други деца
Сакам да знам дека моите деца се под мојот покрив и дека се безбедни кога ќе одам да спијам. Ако спиењето не е кај некој што многу добро го познавам и му верувам, одговорот е „не“ кога моите девојки ќе ме прашаат дали можат да преспијат кај своите пријатели. За среќа, овие прашања не се чести и можеби ќе се чувствувам попријатно со текот на времето. Но, дури и да не е така, нема причина да се согласам на такво нешто и потоа да се грижам цела ноќ. Ќе има многу време да се грижам кога моите девојки ќе заминат на колеџ еден ден.
4. Нема останување будни доцна во ноќта
Моите девојки знаат дека во нашата куќа легнување значи спиење, со неколку исклучоци. Зошто? Затоа што цврсто верувам дека на моите деца им е потребен сон и нема причина зошто да бидат будни, уморни, мрзоволни и да донесуваат лоши одлуки следниот ден. На крајот на краиштата, на децата им требаат цврсти правила за да растат, а не еден куп слобода за да создаваат свои распореди. Исклучоци кога дозволувам да си легнат подоцна се семејните одмори. Во сите други случаи, дури и за време на викендите, одењето во кревет во разумно време е дел од животот кога јас сум им мајка.
„Мојата целокупна филозофија на родителство е дека правилата им овозможуваат на децата да напредуваат затоа што децата знаат што да очекуваат од своите родители“
Овие не се единствените правила што ги следам како строга мајка, само дел од нив. Мојата целокупна филозофија на родителство е дека правилата им овозможуваат на децата да напредуваат затоа што децата знаат што да очекуваат од своите родители. Покрај тоа, правилата исто така им даваат на родителите малку спокојство во застрашувачката и неконтролирана околина. И, верувале или не, во рамките на правилата што ги создадов за моето семејство, ние сè уште се забавуваме и се смееме. Нашата семејна заедница е блиска и полна со љубов, со збиен распоред на активности и друштвени ангажмани. Ги охрабрувам моите девојчиња да пробуваат нови работи и да бидат добри пријателки, но и добри луѓе. Само не во непознати домови или после 20 и 30 часот навечер.
Фото: Pexels
