Тоа доаѓа. И, за родителите, не е секогаш лесен разговор или лесна одлука.
Вакцините за Ковид-19 брзо се појавуваат. Иако сè уште никој не ја тестира вакцината врз деца, сепак може да се каже дека наскоро ќе дојде време кога ковид вакцината ќе стане достапна за децата.
Кога ќе дојде тој ден, што ќе се случи ако сакате вашето дете да ја добие, но вашиот поранешен, или ко-родител, не го сака истото?
Како адвокат за разводи, од прва рака гледам како се водат отровни војни меѓу разведени родители, анти и про-вакцините. Овие случаи ги гледаме со изненадувачка редовност во нашата адвокатска канцеларија во Торонто.
Како судовите се справувале со ваквите несогласувања меѓу родителите во минатото?
„Избирањето да не се изврши вакцинација не е нелегално или неморално. Тоа е личен избор. Не можам да најдам ризик ако детето остане невакцинирано. Вакцините може да донесат дополнителни ризици“. Ова е извадок од последен случај од јануари 2020. година, а тука антиваксерот „победил“ и децата не примиле имунизација. Ако родителот кој е ЗА вакцинација ги вакцинирал децата и покрај ваквата одлука на судот, тоа би се сметало за непочитување на судот и би се соочил со казна, па дури и затвор.
Во друг случај судот донел одлука за родителот кој е ЗА вакцинација со следното гледиште: „Има научни студии кои покажале дека вакцинацијата може да биде штетна. Но, контролата на одредени заразни болести низ светот едноставно е надвор од дискусија. Рационализирањето од оние против вакцинацијата дека таквиот феномен би се развил без користење на вакцинација е нелогично“.
Ако родителите не се согласуваат, како ќе одлучи судот?
Судовите не сакаат да ја носат оваа одлука наместо вас. Науката не е дел од судовите. Тие нема да се вклучат во дебата од таков тип. Само се грижат за емоционалното, психолошкото и физичкото здравје на децата.
„Што е во најдобар интерес за детето?“ – ова е нивното главно прашање. Што значи, во зависност од ситуацијата, може да се донесе одлука во корист или на едната или на другата страна.
Што со постарите деца или тинејџерите? Дали тие имаат право на мислење ако родителите не се согласуваат?
Легално, можно е на тинејџерот да му се дозволи да одлучи за себе ако неговиот лекар мисли дека тој е компетентен да го направи изборот. Лекарот во тој случај треба да биде уверен дека малолетникот ја разбира природата на третманот и ефектите од него. Тоа значи да биде свесен и за последиците од одбивањето на третманот. Според моето искуство, кога станува збор за имунизацијата, тинејџерите повеќе му веруваат на советот од лекарот отколку од родителите.
Ризиците се високи
Изгледа дека одлуката на родителите за вакцините што подолго време постојат е полесна. Но, сега се соочуваме со нешто ново. А несаканите ефекти од новата вакцина сè уште не се познати. Но, ризиците се повисоки ако заразата не престане да се шири. Ако училиштата, владите и јавното здравство ги направат вакцините задолжителни за запишување во училиште, тогаш изгледа дека во најдобар интерес на детето е да биде вакцинирано.
Како да се постапи
Антиваксерите и проваксерите (па дури и родителите кои само се двоумат околу вакцините), имаат радикално различни гледишта, но сите веруваат дека го сакаат најдоброто за своите деца. Судиите се туѓинци кои не ве познаваат, ниту вашите деца. Не сакаат да бидат одговорни за носењето на овие одлуки. Тие ќе ги следат препораките на властите, па ако владата донесе одлука за задолжително вакцинирање, детето ќе мора да ја добие вакцината, без разлика кој што мисли за сето тоа.
Родителите треба да разговараат со лекарот на детето и да дискутираат за вакцината – да дознаат што повеќе информации за самата вакцината; ако се разведени, треба да разговараат соодветно, па дури и преку адвокати или социјални работници за успешно да се справат со емоциите за време на процесот. Нели е тоа далеку подобра опција од тоа да му ја оставите одлуката на судија кој не знае ништо за вас или вашето дете и кој ја темели својата одлука на ограничените знаења и информации и на сопствените верувања за вакцината?
Фото: Pixabay
