Ротацизмот всушност претставува пореметување во изговорот на гласот Р. Знаеме дека голем дел од децата се соочуват со проблем кога станува збор за изговарањето токму на овој глас.
Гласот Р во однос на другите гласови бара добра подвижност на јазикот и координирани движења на јазичните мускули. Исто така, потребна е и добра физиолошка зрелост кај детето и токму заради тоа овој глас се создава подоцна, односно на 4-5 годишна возраст.
Пореметувањето на гласот Р може да се јави како:
– Омисија, кога гласот Р се испушта
– Супституција, замена на гласот Р со друг глас
– Дисторзија, неправилна артикулација на гласот Р
Најчести причини кои доведуваат до пореметување во изговорот на гласот Р се:
Органски (краток јазик, краток френулум, расцеп на непце или невролошки проблеми) и физиолошки (задоцнет говорно-јазичен развој).
Неправилниот изговор на гласот Р се толерира до 5 години, а потоа треба да се побара задолжителна логопедска помош.
Навременото отпочнување со логопедски третмани за корекција на гласот Р доведува до полесен и пократкотраен третман.
Клинички логопед-специјалист, Благица Маркоска, Интеракција плус, Скопје
Фото: Pexels
