Нова Хунија е родена со непозната генетска болест. Сепак, и покрај сите тешкотии со кои се соочиле нејзините родители, оваа приказна е доказ дека љубовта ги руши сите препреки, без оглед колку и да ги има. Кога девојчето Нова се родило во 2017. година во Нов Зеланд, лекарите им рекле на нејзините родители Акација и Џозеф Хунија дека бебето има деформитети на лицето и веројатно станува збор за генетско нарушување, но дека нејзината дијагноза нема име, ниту може да се претпостави во која насока ќе се развива понатаму.
Нова веднаш по раѓањето, освен деформитетите на лицето, имала потешкотии со дишењето и голтањето, а денес, на 4-годишна возраст, таа има и проблеми со слухот. Кога Нова пристигнала дома по породувањето, Акација и Џозеф биле очајни бидејќи никогаш не виделе личност со слична дијагноза, која дури немала ниту име. Тие не знаеле каква иднина ја чека нивната ќеркичка или како ќе се справат со нејзината здравствена состојба.
Мајката Акација во интервју за ТВ Баркрофт рекла: „Кога размислував за мајчинството, не очекував да родам дете со генетско пореметување. Мојот живот се преврте наопаку и си помислив: ‘Па, како ќе се вклопиме, каков живот ќе има моето мало девојче?’“
Кога на интернет ја откриле блогерката Маримар Баркрофт, која живее со истата болест, сфатиле дека нивното мало девојче не е единствената што ја има оваа деформација. Гледајќи го филмот за Маримар, родителите на Нова сфатиле дека, иако девојчето има деформитети, тие не ја дефинираат како личност, ниту влијаат на нивната љубов кон неа. Да се биде родител на Нова и грижата за дете со посебни потреби ги научило мама Акација и тато Џозеф да бидат љубезни кон себе и кон другите.
„Научивме многу за трпеливоста, затоа што секогаш чекаме нешто со Нова – прегледи, информации што нè интересираат, резултати од разни прегледи”, вели тато Џозеф.
Нова во развојот заостанува зад своите врсници, а нејзините родители се радуваат со секој нејзин, дури и најмал напредок. Нова денес има 4 години, оди, трча и скока. Таа има потешкотии во голтањето, па нејзините родители ја хранат на сонда. Таткото Џозеф за Баркрофт ТВ изјавил: „Ние сакаме Нова да живее исполнет живот, да биде сигурна во себе и во нашата љубов, да запознава нови луѓе, да учи нови животни вештини и да има убав живот“.
„Различноста на Нова, нејзината деформација на лицето во никој случај не ја намалува нејзината вредност како личност, ниту ја дефинира како личност, а со ова филмче сакавме да ги охрабриме родителите на деца со посебни потреби и да им дадеме надеж дека ги чека исполнет живот“, додава мајката Акација.
Фото: Принтскрин/Инстаграм
