Податоци собрани низ целиот свет сè повеќе укажуваат на тоа дека градинките и училиштата не се жаришта на инфекција со коронавирус. И покрај стравот, бројот на случаи со КОВИД 19 не се зголеми кога училиштата и градинките повторно се отворија по олеснувањето на строгите мерки пролетта. И кога се јавува инфекција во колективот, тоа обично резултира со само мал број лица кои се разболуваат.
Сепак, истражувањата исто така покажуваат дека децата можат да се заразат со вирусот и да го шират, но поверојатно е тоа да се случи кај постарите деца. Научниците велат дека не се јасни причините за овие трендови.
„Училиштата и градинките се идеална средина за пренесување на коронавирус затоа што големи групи се собираат во затворено за подолг временски период“, вели Валтер Хас, епидемиолог од институтот Роберт Кох во Берлин.
Сепак, на глобално ниво, стапката на инфекција со ковид-19 е сè уште многу пониска кај децата отколку кај возрасните, додава тој.
Повеќе од 65 000 училишта во Италија беа повторно отворени во септември. Бројот на новоинфицирани започна да расте во заедницата, но четири недели подоцна беа регистрирани случаи на инфекција во само 1.212 училишта. Во 93 проценти од случаите, пријавен е еден случај на инфекција, а само едно средно училиште имало повеќе од десет заразени лица.
Во сојузната држава Викторија во Австралија, каде започна вториот бран на инфекции во јули, ретки случаи се пријавени и во градинки и училишта. Две третини од 1635 инфекции се однесувале само на еден случај.
Податоците од Велика Британија исто така покажуваат дека возрасните први се заразуваат. Повеќето од 30-те потврдени епидемии во училиштата се однесуваат на пренесување меѓу вработените, а само во два случаи е забележано пренесување од ученик на ученик.
Децата, особено оние на возраст под 12 до 14 години, велат научниците, се помалку подложни на инфекции отколку возрасните, па се сомневаат дека тоа е причината за ваквите податоци.
„Откако ќе се заразат, децата на возраст од 0 до 5 години имаат помала веројатност да го пренесат вирусот на други“, додава Хас.
Во анализата на пет германски училишта, тимот на Хас открил дека инфекциите се поретки кај деца на возраст од 6 до 10 години отколку кај постари деца и возрасни кои работат во училишта.
„Потенцијалот за пренесување се зголемува со возраста, а адолесцентите го пренесуваат вирусот исто како и возрасните“, истакнува тој.
Во САД, стапката на инфекција е двојно поголема кај деца на возраст од 12 до 17 години, отколку кај деца на возраст од 5 до 11 години.
Нејасно е зошто се чини малку веројатно дека малите деца ќе го шират новиот коронавирус, вели Хас.
„Една можност е дека затоа што имаат помали бели дробови, тие се помалку способни да проектираат заразни аеросоли отколку возрасните. Ова се случува кај туберкулозата. Но, кај туберкулозата, инфекцијата се шири од лезиите во белите дробови, а инфекциите со САРС-КоВ-2 се различни бидејќи вирусот ги инфицира горните дишни патишта. Јас сум збунет“, вели Хас.
Друга можност е дека децата потешко пренесуваат помалку вируси затоа што почесто се асимптоматски. Во една британска студија врз група деца на возраст од две до 15 години, до 50% од заразените деца не развиле симптоми.
Фото: Pixabay
