Појавата на таканареченото имплантациско крварење е честа појава кај жените, што не е опасна, а со цел да се утврди дали станува збор за имплантациско крварење или за нешто друго, потребно е да се контактира гинеколог.
Како да препознаете дали станува збор за имплантациско крварење?
Имплантациското крварење е различно од менструацијата, бидејќи трае многу пократко, односно трае од 24 до 48 часа. Ова е времето потребно за оплодената јајце клетка да стане дел од слузницата на матката. Покрај тоа, имплантациското крварење е помалку обилно од самата менструација, крвта е темно кафеава до црна, а понекогаш може да биде розова или светло црвена, и нема згрутчување на крвта или слуз како кај менструацијата.
Исто така, при имплантациското крварење, болката и грчевите што нормално се јавуваат со редовната менструација се многу помалку изразени.
Важно е да се забележат точните симптоми и начини на крварење, такашто гинекологот може подобро да препознае и да го дијагностицира имплантациското крварење. Следете ја бојата и количината на крварење, но исто така и колку траело сето тоа и дали имало други симптоми. Ова ќе помогне да се елиминираат другите состојби како што се полипи или спонтан абортус што предизвикува обилно крварење.
Кои симптоми се јавуваат при имплантациско крварење?
Имплантациското крварење може да биде придружено со некои други симптоми кои се јасен показател дека станува збор за бременост, а тоа се: осетливост на градите, грчеви, надуеност, запек, замор, промени во расположението, повраќање или одбивност кон храна. Ако ги забележите овие промени, направете тест за бременост.
Најточен резултат ќе биде една недела од датумот кога требало да имате менструација. Без оглед на резултатите од тестот, контактирајте гинеколог за да ја потврдите бременоста или да откриете што предизвикало крварење кое не било менструација.
Имплантациското крварење е многу честа појава кај жените и не значи дека бебето е изложено на ризик на кој било начин. Ова крварење се повлекува само по себе и не остава никакви последици. Важно е да се напомене дека некои жени нема да имаат крварење, додека кај некои ова крварење нема да биде толку изразено и тие дури нема да забележат дека станува збор за имплантациско крварење.
Кога треба да контактирате со лекар?
Треба да контактирате со вашиот лекар откако ќе направите тест за бременост, но исто така и ако забележите дека крварењето трае неколку дена и не е типичен менструален циклус. Исто така, кога крварењето е обилно и ова ве загрижува, консултирајте се со лекар.
Крварењето во бременоста може да биде последица од промени во хормоните, појава на полипи, а може да станува збор и за инфекции или сексуално преносливи болести, како и за абортус. Затоа е важно да контактирате со гинеколог и да отфрлите одредени сомнежи.
Заклучок
Имплантациското крварење е нормална појава во раната бременост и не е опасно. Иако се јавува во времето на менструацијата и има слични симптоми, постојат неколку карактеристики според кои може да се препознае дека станува збор за имплантациско крварење. Меѓутоа, ако ова крварење трае подолго време или е пообилно, а не станува збор за редовна менструација, потребно е да се посети гинеколог.
Фото: Pixabay
