Оние деца кои претрпеле адаптација пред година-две, деновиве се плашат од нов почеток. Повеќето деца заборавиле како изгледа да се станува рано секое утро и да се следи правилниот распоред во текот на денот. Дали ќе го пречекаат првиот ден од градинката со леснотија и ентузијазам, желни за друштво и динамични денови или лесно и со задоволство се навикнале на тоа да немаат никакви обврски, па одењето во градинка ќе им биде како да одат за првпат?
Има и такви кои навистина одат за првпат, и сите сигурно го чувствуваат стравот и неизвесноста со која многу родители сега ги праќаат во градинките.
Денеска отидовме да купиме папучки. Ања ги надрасна своите од градинката за два полни броја. Ги избравме брзо и лесно, и кога се разбуди по попладневната дремка и кога беше време да се обратиме за потврда дека сме здрави, мојот четиригодишник сфати дека не сака да оди во градинка. И додека Ања едвај чека да влета во нејзината група за предучилишна возраст, со него морав да употребам еден мал трик за кој неодамна слушнав и кој навистина ми се допадна.
„Добро, Оги, разбирам дека не сакаш. И кажи ми, што ти се допаѓа најмногу во градинка, а што навистина не сакаш? “
„Не ми се допаѓа што ќе ми се смеат затоа што порано плачев“, вели низ солзи.
„Сите плачеа претходно. А некои и повторно ќе плачат. Но, тоа е затоа што заборавиле на сите убави работи што се случуваат во градинка.
Како и да е, имам една тајна за тебе. Еден трик за кој ќе знаеме само јас и ти. Може ли? “
„Може…“
„Вака ќе направиме. Дента пред да одиш во градинка, за да не може никој да види, ќе влеземе во твојата соба и јас ќе ти ги наполнам џебовите со бакнежи. Колку што може да собере! А ти, кога ќе ти затреба мојот бакнеж, само извади еден или два од џебот и залепи си ги на образот. Добро? ”
Оги кимна со главата и провери дали шорцевите имаат џебови. Стана и отиде да руча во многу подобро расположение. Се прашувам дали тој навистина ќе извади бакнежи од џебовите кога ќе ја посака прегратката на мама?
Текстот е од ТУКА.
Фото: Pexels
