Шеф Маре Јаневска веќе 11 години е готвачка во британската резиденција и се грижи за сe што поврзано со храна и менаџирање на резиденцијата. Се разбира, благодарение на огромниот талент, искуство и креативноста, честопати е ангажирана и за многу други настани, а дел е и од организацијата Слоу Фуд Македонија.
Има два сина, четиринаесетгодишниот Давид и седумгодишниот Марко. Токму помалиот е на пат да ја наследи во професијата бидејќи уште откако застанал на свои нозе пројавува интерес за се што се случува во кујната и здушно ѝ помага на мајка си во се што има врска со готвење, месење, испробување нови рецепти, поставување трпеза, …
„Често, во деновите кога сме сите дома па знаеме да си поспиеме малку подолго или пак после попладневниот одмор, Марко знае да дојде во спалната и да ни нареди мене и на татко му да не стануваме туку да почекаме да ни донесе појадок во кревет или пак, ако станува збор за попладневна дремка – десерт или некој микс од пијалоци. И навистина се труди, но понекогаш знае и да направи некои прилично чудни комбинации кои потешко се голтаат“, се смее Маре.
На пример, една од тие комбинации е џин-тоникот кој нејзиниот сопруг во една пригода го добил измешан со мастика, што вели таа, баш и не било вкусно за пиење. Сепак, почесто се тоа успешни миксови кои тие, иако понекогаш се уште сити од ручекот, мораат да ги пробаат од едноставна причина што е Марко навистина кретивен и знае да им подготви одлични изненадувања.
Маре и Марко веќе имаат и свои заеднички ангажмани кои се врзани за одредени празници па на пример, за Божик заедно прават кекси во форма на Дедо Мраз, за Велигден месат пити и други убави залчиња и веќе сега се чувствува дека е подготвен да ја „шишне“ и да стане и самиот готвач нумеро 1.
А дотогаш… уживајте во специјалитетите на Маре.
